Vel heppnaður aðalfundur og klúbbmót

Aðalfundur félagsins var haldin í dag kl 11:00 á áður auglýstum fundartíma í félagsheimili KKA í Glerárhólum. Ágætlega var mætt til fundar þar sem formaður vor lagði m.a. fram ársreikning félagsins, ljóst er að rekstrarstaðan er góð og mikill hugur í mönnum að vinna félaginu sínu gott og farsælt starf á komandi rekstrarári.

UMGENGNI um félagsheimili og aðstöðu okkar var til umræðu og það er ljóst að félagsmenn verða að leggjast á eitt í þessu máli. Breið samstaða er um úrbætur sem kalla meðal annars á hugarfarsbreytingu hjá öllum notendum aðstöðu okkar. Aðgerðir sem miða í þessa átt verða kynntar rækilega hér á vefnum innan tíðar.

Að fundi loknum var slegið í Endúró-klúbbmót og þrautakóng sem lukkaðist alveg frábærlega. Vefstjóri hefur ekki tölu á öllum þeim armbeygjum sem hann var látinn gera á milli hringja og situr því við tölvuna með strengi.  Formaðurinn var með myndavélina á lofti og von er á myndum og umfjöllun um þessa skemmtilegu uppákomu frá honum innan skamms.

Takk fyrir frábæran dag :)