Ökumannstryggingar falla niður á torfærutækjum um áramótin.

Ný umferðarlög taka gildi 1. janúar 2020.    Ákvæði um fébætur og vátryggingar voru sett í sérstök lög sem heita Lög um ökutækjatryggingar og taka gildi á sama tíma.   Í 11. gr. eru létt bifhjól í flokki I og torfærutæki undanþegin vátryggingaskyldu.   Þetta þýðir t.d. slysatrygging ökumanns verður ekki á vélsleðum,  ekki á krossurum,  ekki á mörgum böggí bílum og fjórhjólum.   Sem sé engin ökutæki á rauðum númerum hafa slysatryggingu ökumanns.   Þetta býður upp á ýmsar flækjur eins og t.d. að farþegi er tryggður nema hann sé eigandi,  en ökumaðurinn aldrei.   Trúlega er ekki búið að undirbúa slysatryggingar sem margar hverjar undanþiggja slys á vélknúnum ökutækjum.   Launþegi sem slasast á vélsleða í vinnunni myndi þá t.d. ekki eiga rétt á greiðslu úr slysatryggingu launþega,  því gert er ráð fyrir að hann eigi rétt úr slysatryggingu ökumanns sem verður ekki lengur fyrir hendi.

Óljóst er hvort tryggingarfélögin muni bjóða upp á slysatryggingar ökumanns með bótum skv. skaðabótalögum (þ.e. eins og verið hefur).  Vonandi verður það gert og á viðráðanlegu verði.   Slysatryggingar veita ekki sambærilega vernd.   Þið þurfið að ræða þetta sérstaklega við ykkar tryggingarfélag.    Skoða þarf hvaða tryggingakröfur verða gerðar á keppnum, það ræðst vitanlega af því upp á hvaða tryggingar tryggingarfélögin munu bjóða.  

KKA hefur barist fyrir því að ökumannstryggingar verði á mototcrosshjólum og telur það mikið hagsmunamál fyrir iðkendur og reyndar líka félagið sjálft.  LÍV og MSÍ gerðu margar athugasemdir við frumvarpið þegar það kom fram 2012,  sbr. hér.   Í þessum athugasemdum kemur fram hversu erfitt það getur orðið að reka motocrossbrautir í framhaldi af þessum breytingum o.m.fl.   Frumvarpið lagaðist en Alþingi kaus að hafa þessar þrengingar á tryggingarvernd.    Eftir margra áratuga vinnu tókst loks árið 1988 að tryggja alla aðila vegna hættu af vélknúnum ökutækjum.   Með þessu er tekið skref aftur á bak hvað það varðar.

Fyrir utan þessi vandkvæði eru ýmis álitaefni varðandi tryggingar keppnistækja í lögunum en ekki verður farið nánar út í það hér að svo stöddu.